Condividiamo questa preghiera-poesia del nostro don Raimondo
VULÈSSE AVÉ CCHIÙ TIEMPO
Vulèsse avé cchiù tiempo,
nu poco ‘e tiempo ‘e cchiù.
Nu poco ‘e tiempo ‘e cchiù,
comme ‘o vulìsse tu!
Nun tengo nu minuto
manco pe’ me guardà!
‘A vita corre e scorre
e nun se pò ferma’!
Nun passa na jurnata,
che già accummència n’ata!
E ce facimmo ‘a Croce
pe’ n’ata faticata!
Vulèsse avé cchiù tiempo,
pe’ sta nu poco ‘a casa;
pe’ me gudè ‘a famiglia:
marito, moglie, figli!
Vulèsse avé cchiù tiempo,
pe’ gghí ‘a casa da’ nonna;
sta semp sola sola, sta povera Maronna!
Vulèsse avé cchiù tiempo,
pe’ ‘a fa parla’ nu poco…
ma pò se mette e conta
semp ‘a stessa canzone!
Vulèsse avé cchiù tiempo
… l’avìmme semp dìtto!
E mo’ che tenìmme ‘o tiempo
nun stamme cchiù ‘a diritto!
Chiusi, dint ‘a sti case,
parìmme tanti ordigni:
abbàsta na parola
e scoppia ‘o parapiglia!
Ne usciremo presto! Più buoni, migliorati!
Il mondo cambierà! Nulla più come prima!
Insieme ne usciremo!
E andrà tutto bene…!
Uh quanti vvòte ‘e sento, tutti chisti proclami!
Futtuti da’ paura, siamo tutti fratelli… pe’ fino cu ‘e vicini!
Ma, appena aizámme ‘a capa,
…siam Guelfi e Ghibellini!
Tu ne tirato ‘o quadro
e je ne tiro ‘o chiuovo!
Tu dici na parola,
ma je ne dico ddoje!
Vulèsse avé cchiù tiempo,
ma ‘o tiempo nun è ‘o mio!
Vulèsse avé cchiù tiempo,
ma ‘o tiempo è dono ‘e Dio!
Vulèsse avé cchiù tiempo,
ma ‘o tiempo nun è ‘o mio!
E nun è ‘a mia sta vita,
che è scritta cu ‘a matita!
Vulìte avé cchiù tiempo?
Ecco! Tenìte ‘o tiempo!
Ma nun ve cumpurtate
‘a màneca ‘e fetienti!
Pensa: quant’anni tieni?
Da quanto staje campanne?
Ecco…da quel momento,
tu me stai respiranne!
‘O tiempo è solo un segno,
ma un segno assai prezioso.
T’affido chistu segno.
Tu cerca ‘e n’essere degno!
(don Raimondo Di Rienzo, 22 aprile 2020 – ai tempi del covid-19)
